ភ្នំពេញ៖ គណៈកម្មាធិការជាតិរៀបចំការបោះឆ្នោត(គ.ជ.ប) បានបញ្ជាក់ថា ដំណើរការបោះឆ្នោត បានប្រព្រឹត្តទៅដោយជោគជ័យ និងក្នុងបរិយាកាសស្ងប់ស្ងាត់ មានសន្តិសុខ សុវត្ថិភាព និងសណ្តាប់ធ្នាប់ សាធារណៈ គ្មានអំពើហិង្សា និងគ្មានការគំរាមកំហែងឡើយ។

បើទោះបីមានបញ្ហាអាកាសធាតុ និងមានចលនាញុះញង់ពីក្រុមបក្សប្រឆាំងក៏ដោយ ក៏ដំណើរការបោះឆ្នោតបានបញ្ចប់ទៅដោយរលូន។ គ.ជ.ប បានបញ្ជាក់ឱ្យដឹងទៀតថា ការិយាល័យសរុបចំនួន២៣,៧៨៩ នៅទូទាំងប្រទេស បានបើកបម្រើឱ្យការបោះឆ្នោតទាំងអស់ ដោយពុំមានការិយាល័យណាមួយ ដែលមិនបានបើកនោះទេ។

អ្នកនាំពាក្យគ.ជ.ប លោក ហង្ស ពុទ្ធា បានបញ្ជាក់ថា កាលមិនទាន់មានការបោះឆ្នោត គ.ជ.ប បានទទួលបណ្តឹងពាក់ព័ន្ធនឹងករណីញុះញង់ តាមបណ្តាញសង្គមមិនឱ្យប្រជាពលរដ្ឋទៅបោះឆ្នោត ឬឱ្យគូសបំផ្លាញសន្លឹកឆ្នោតចោល ដោយបណ្តឹងខ្លះត្រូវបានដោះស្រាយ។ ក្រោយបោះឆ្នោតរួចរាល់ គ.ជ.ប នឹងទទួលបណ្តឹងពាក់ព័ន្ធនឹងបញ្ហាផ្សេងៗបន្ថែមទៀត៕